"Mehringiz ummoniga g'arq bo'lay, onajon!"

Shaharda o'qib yurgan kezlarimda onam tushlik paytlari qo'ng'iroq qilib, nima yeganim haqida, albatta, so'rardi. Men "O'zinglar-chi?" deganimda, bolamning ko'ngli ketmasin deb "Shu non-choy" deb qo'yardi, xolos. Oh, mening soddagina onam-a...

Bolaligimda tunlari isitmam ko'tarilganda onam yonimdan bir qadam ham jilmay, atrofimda parvona bo'lib, hatto tuz ham totmay, mehnatdan qadoq bo'lgan qo'llari bilan peshonamni silab, menga shifo so'rashini ko'rib, sog'ayishni umuman istamasdim. U har doim yonimda bo'lishini, meni hammadan ziyodroq yaxshi ko'rishini, uni qizg'anganimdan opalarim bilan aytishib qolishimizni eslasam, yuzim kuladi-yu, ammo ko'zlarim namlanadi.

Endi qayerdasiz, onajon? Men yana bolalik onlarimga qaytishni istayman, onajon. Buning uchun kasal bo'lishga, tuzalmaslikka ham tayyorman. Faqat qoshimda sizni ko'rgim keladi. Peshonamdan qayta-qayta silashingizni, mehr to'la ko'ksingizga bu cho'yanday og'ir boshimni qo'yib, sizni, faqat sizni qattiq yaxshi ko'rishimni aytgim kelmoqda-yu, ammo siz yo'qsiz.

Nega avvallari men nodon sizni ko'proq bag'rimga bosmagan ekanman-a? Siz bilan sayllarga chiqib, qo'lingizni mahkam tutib, "Bu mening onam, men onamni juda yaxshi ko'raman", deb nega baralla aytmadim?

Onajon, agar mo'jiza ro'y berib, yana bir bor yonimda bo'lsangiz, qo'llaringizni mahkam tutardim-u, ketishingizga aslo yo'l qo'ymasdim. O'tinaman, onajon, hech bo'lmasa, tushlarimda yonimga keling. Meni bu gavjum dunyoda yolg'izlik ko'chasiga tashlab ketmang... Aqalli tushlarimda mehringiz ummoniga g'arq bo'lishni istayman, onajon...

Turonbeka
Manba: www.hazon.uz

Ushbu bo'limdagi yana bir maqola « Izg'irinda qolgan qalb Baxt »

2

  • Shoista

    Ofarin :'(

    Shoista 17.11.2017 15:03
  • Aziza

    Juda chiroyli so'zlar

    Aziza 15.11.2017 17:46

Fikr bildiring

Sahifa boshiga qaytish